۲۴ ساعت

زړه ته خطاب

تاریخ نشر شنبه ۱۲ جدی  ۱۳۹۴ – دوم  جنوری  ۲۰۱۶ هالند

زړه ته خطاب

مولانا داکتر محمد سعید  « سعید افغانی »

تر څو به د خپلی هوا او هوس  لپاره دومره مشکلات  او ستونځی  زغمی ؟

 ته… هو :  ته په یاد لری او که نه ! هغه خاطرات ؛ هغه  ورځی او شپی ، هغه خواږه اشنایان ، هغه د لطف او نزاکت او شوخی مجلسونه ؟

ولاړل ،  تیر شول او تیریږی !  یقین لرم چی  ته هغه له یاده نشی ویستلی ، څنګه هغه ستا په ژوند پوری پوره اړه لری .

ای زما  زړه  !!!  او ای د خلکو زړونو !!! 

پو هیږم چی هڅی ، تلوسی او امیدونه لری،  او د خپلو پریشانیو او کړاونو له لاسه  ځوریږی . یقینآ چی تاسو زیاتی هڅی او هیلی لری نو ځکه  د ستاسو د هیلو او هڅو په  خاطر  د زوړنو  احساس  او عواطف غواړم .

ای زما  د ځان ملګریه  زړه !!!  ای د عشق او د مینی مرکزه !!!

هغه عشق او مینه چی  تا دخلکو څخه پټه ساتله فاش او رسوا شوه ځکه چی  ستا  د عشق  او مینی پوره داستان د ریکاټ په مخ ثبت شو او د موسقی په دفتر کښی ولیکل شو .

هو :  ستاد ژوند خاطری د کتاب د پاڼو په مخ او د ریکاټ  په پردو کښی وساتل شو ، لو ستونکی ئی لولی او اوریدونکی ئی آوری او پوهیږی چی دا داستان د زړه عواطف او ملکوتی  الهامات دی ، دا د وطن ، ملک ، قام ، قبیل او د  ملت د نهضت  او پر مخ تګ  د پاره امیدونه ، هیلی او هڅی دی ، دا د هغه ارمانونو معراج  دی کوم چی  د ډیرو کلونو څخه  وروسته  په لاس راغلی دی .

ای زما ګرانه زړه !!! 

ته هغه با نعمت وقیمتی شی ئی  چه د الهی د محبت او مرحمت نور تا ته حرکت ، قوت او برکت در کوی ! نو  اوس هو .. اوس عهد وکړه چی د ځان او دخلکو د خدمت د پاره مینی ، محبت ، عشق او جذبی ته ادامه ورکړی تر څو د هغه مخکښی تللی قافلی ته په ډیر زور او قوت سره ځان ورسوی ، کوم چه د انسان  د خیر او مصلحت، سعادت او اسایش لپاره زمینه او وسایل برابره وی .

سعید افغانی

کابل ـ ۱۳۵۵ هجری شمسی